Daga; USMAN NASIDI, Kaduna.
DUKKAN tsare-tsare sun gama kammala domin Kaddamar da shirin Kungiyar Ashoka tare da abokan haɗin gwiwar ta mai taken don ƙaddamar da ayyukan “Kowa Mai Kawo Canji Ne” a garin Kaduna ta hanyar musayar ra’ayoyin dabarun gina aminci tsakanin al’umma musamman ga yara matasa yan makarantun sakandare domin samun damar zama masu dogaro da kan su yayin tasowa.
Ashoka wata kungiya ce mai zaman kanta ta kasa da kasa wacce ke ginawa da raya al’ummomin shugabannin canji wadanda suke ganin duniya kuma suna bukatar kowa ya zama mai kawo canji.
Da yake bayani a wani taron manema labarai daya gudana a dakin taro na Interfaith Mediation Center dake Kaduna, Jigo a Kungiyar Ashoka, Mista Mathias Bodam Yashim, ya bayyana cewa zasu karfafa aminci a tsakanin Jigon Jagoransu na Juyin Juya Halin tare da ba da damar sada zumunci da hada kai a tsakanin abokan tarayyarsu.
Ya kara da cewa dalilin wannan yunkurin shi ne saboda sun yi imanin cewa tabbas duniya za ta kasance wuri mafi kyau wanda kowane dan Najeriya, kowane dan Afirka da kowa a duniya zai gane kuma ya mallaki ikon da suke da shi na ba da gudummawa don amfanin jama’a.
Ya ce “an gudanar da taron kaddamar da kungiyar na kasa mai tarihi a Legas a ranar 11 ga Mayu, 2022 da ranar 23 ga watan yuni a garin Abuja, kana ana saran Kaddamar dana Jihar Kaduna a ranar 24 ga watan Nuwambar shekarar 2022.”
“Kaddamar da shirin kungiyar mai taken “Kowa Mai Kawo Canji Ne” a yankin Kaduna, wata muhimmiyar dama ce ta zaburarwa da karfafawa kowa gwiwa ta hanyar rabawa da yada shi ta dukkan kafafen yada labarai, masu hangen nesa da manufa dominn isar da muhimman sakonni, labaran rayuwa na samarin canji, bidiyo, da kayan aiki da albarkatu masu amfani waɗanda ke amfanar kowa da kowa.”
“Taron ƙaddamarwa zai ƙunshi labarai na ainihi, tattaunawa, gabatarwa, tambayoyi, da sauran damar kafofin watsa labarai don ɗaukar saƙonni da abun da ke ciki don yadawa ta hanyar tattaro wakilan kafafen yada labarai, masu ruwa da tsaki a Kaduna, da kuma shugabannin kungiyar “Kowa Mai Kawo Canji Ne” don raba ra’ayoyi da dabaru.”
Ya kuma yi bayanin cewa tafiyar za ta kunshi labarai na gaskiya, tattaunawa, gabatarwa, hirarraki da sauran damammaki ga kafafen yada labarai na daukar sakonni da bayanai don yadawa.
“A yanzu muna rayuwa a cikin duniyar da aka bayyana ta hanyar canji, rikitarwa da rashin tabbas, ya kara da cewa don bunƙasa a cikin wannan sabuwar duniya, muna buƙatar sabon tsarin da zai ba mu damar fahimtar gaskiyarmu ta ci gaba da haɓakawa tare da samar da mafita don amfanin gama gari duka.
“Hanya daya tilo da za mu sauya tunanin mutane sama da miliyan 1.1 a cikin babban birnin Kaduna da kuma ‘yan Najeriya sama da miliyan 200 da kuma taimaka musu su tashi tsaye a matsayin masu kirkira a cikin sabuwar hakika ita ce lokacin da kafafen yada labarai suka dauki nauyin fadakarwa, ilmantarwa, da fadakarwa ƙarfafawa kowa da kowa, ta hanyar yada sakonnin ƙarfafawa na “Kowa Mai Canji Ne”.
“Dangane wannan hangen nesa na “Kowa mai Canji Ne”, kafofin watsa labaru (TV, Rediyo, masu Wallafawa, Jaridu, shafukan yanar Gizo, kafofin watsa labarun, masu tasiri, masu kirkiro abun da ke ciki, da dai sauransu) dole ne su taka rawar gaba a matsayin zakarun kowanne ayyukan.
“Wannan shi ne hadin gwiwar Ashoka tare da abokan huldar yada labarai tare da kafafen yada labarai, masu buga littattafai, malamai, dalibai da sauran wadanda tuni suke isa ga kowa da kowa a kowace rana a cikin lungu da sako na Najeriya don yada manufar kungiyar mai taken “Kowa mai Kawo Canji Ne,” in ji shi.
A cewar sa, sun horas da matasa a kalla dubu hamsin da hudu a kudancin Kaduna a cikin makonni goma, kana suna saran horar da wasu matasa dubu hamsin a cikin makonni takwas a Arewacin Jihar bayan kammala Kaddamar da shirin.
Source:
Kungiyar Ashoka Za Ta Kaddamar Da Shiri Mai Taken “Kowa Mai Kawo Canji Ne” A Kaduna
